ന്യൂഡല്‍ഹി: കേന്ദ്ര ഉപഭോക്തൃ സംരക്ഷണ സമിതി (സിസിപിഎ) ഇ-കൊമേഴ്സ് കമ്ബനിയായ ഫ്ലിപ്പ്കാര്‍ട്ടിന് പിഴ ചുമത്തി. ഗുണനിലവാരമില്ലാത്ത പ്രഷര്‍ കുക്കര്‍ വിറ്റതിനാണ് പിഴ. ഒരു ലക്ഷം രൂപയാണ് പിഴ ചുമത്തിയത്. പിഴ ചുമത്തിയത് ഉപഭോക്താക്കളുടെ അവകാശം ലംഘിച്ച്‌ എന്നു ചൂണ്ടിക്കാട്ടിയാണ്.
സിസിപിഎ നിലവാരമില്ലെന്നു കണ്ടെത്തിയ പ്രഷര്‍ കുക്കറുകള്‍ വാങ്ങിയ 598 ഉപഭോക്താക്കളെ ഇക്കാര്യം അറിയിക്കാനും നിര്‍ദേശിച്ചു. ഉപഭോക്താക്കളില്‍ നിന്ന് പ്രഷര്‍ കുക്കറുകള്‍ തിരിച്ചുവിളിക്കാനും അവയുടെ വില തിരികെ നല്‍കാനും 45 ദിവസത്തിനുള്ളില്‍ റിപ്പോര്‍ട്ട് സമര്‍പ്പിക്കാനും സിസിപിഎ ഫ്ലിപ്കാര്‍ട്ടിനോട് നിര്‍ദ്ദേശിച്ചു.
കമ്ബ്യൂട്ടറുകളും പ്രിന്ററും ഉപയോഗിച്ച് വ്യാജനോട്ടും ലോട്ടറി ടിക്കറ്റും അച്ചടിച്ചു; മലപ്പുറത്ത് ഒരാള്‍ പിടിയില്‍
മലപ്പുറം: കമ്ബ്യൂട്ടറുകളും പ്രിന്ററും ഉപയോഗിച്ച് വ്യാജ ഇന്ത്യന്‍ കറന്‍സി നോട്ടുകളും വ്യാജ ലോട്ടറി ടിക്കറ്റുകളും അച്ചടിച്ച്‌ വില്‍പ്പന നടത്തിയ സംഘത്തിലെ ഒരാള്‍ മലപ്പുറത്ത് പിടിയില്‍.
വ്യാജ ഇന്ത്യന്‍ കറന്‍സി നോട്ടുകളും വ്യാജ ലോട്ടറി ടിക്കറ്റ് അടിച്ചു വില്പന നടത്തുന്ന സംഘത്തിലെ മൂന്നാം പ്രതിയായ വയനാട് മാനന്തവാടി വിമല നഗറില്‍ കാഞ്ഞിരത്തിങ്കല്‍ വീട്ടില്‍ ജെയിംസ് ജോസഫിനെയാണ് (46) പൊലീസ് പിടികൂടിയത്. പെരുമ്ബടപ്പ് പൊലീസാണ് ഇയാളെ അറസ്റ്റ് ചെയ്തത്.
പെരുമ്ബടപ്പ് പൊലീസ് സ്റ്റേഷനിലെ പ്രത്യേക അന്വേഷണസംഘം വയനാട്ടിലെ മാനന്തവാടിയില്‍ നിന്നാണ് പ്രതിയെ അറസ്റ്റ് ചെയ്തത്. പെരുമ്ബടപ്പ് പൊലീസ് സ്റ്റേഷനില്‍ രജിസ്റ്റര്‍ ചെയ്ത് അന്വേഷണം നടത്തി വരുന്ന ഈ കേസിലെ ഒന്നാം പ്രതിയായ അഷ്റഫിനെയും രണ്ടാം പ്രതിയായ പ്രജീഷിനെയും പെരുമ്ബടപ്പ് പൊലീസ് അറസ്റ്റ് ചെയ്തിരുന്നു. നിര്‍മ്മാണത്തിന് ഉപയോഗിക്കുന്ന കമ്ബ്യൂട്ടറുകളും പ്രിന്ററും വ്യാജ ലോട്ടറി ടിക്കറ്റും വ്യാജ ഇന്ത്യന്‍ കറന്‍സി നോട്ടുകളും ഇവരില്‍ നിന്ന് കണ്ടെടുത്തിരുന്നു.
പൊലീസ് കസ്റ്റഡിയിലുള്ള പ്രതികളെ വിശദമായി ചോദ്യം ചെയ്തതില്‍ വ്യാജ ലോട്ടറി ടിക്കറ്റുകള്‍ നിര്‍മ്മിക്കാന്‍ വേണ്ടി വിവിധ ലോട്ടറി ഏജന്‍സികളുടെ സീലുകള്‍ മൂന്നാം പ്രതി ജെയിംസ് ജോസഫിന്റെ സഹായത്തോടു കൂടിയാണ് നിര്‍മ്മിച്ചതെന്ന വിവരത്തെത്തുടര്‍ന്നാണ് ഇയാളെ അറസ്റ്റ് ചെയ്തത്. ജെയിംസ് ജോസഫിനെതിരെ വ്യാജ നോട്ട് നിര്‍മ്മാണത്തിനും വ്യാജ സ്വര്‍ണം പണയം വെച്ചതിനും പനമരം , പുല്‍പ്പള്ളി, മാനന്തവാടി , കണ്ണൂര്‍ ടൗണ്‍ , ആലത്തൂര്‍ എന്നീ പൊലീസ് സ്റ്റേഷനുകളില്‍ കേസുകള്‍ നിലവിലുണ്ട്. കോടതിയില്‍ ഹാജരാക്കിയ പ്രതിയെ കോടതി 14 ദിവസത്തേക്ക് റിമാന്‍ഡ് ചെയ്തു.
