ബോഡി മസാജിനിടെ കഴുത്തിനേറ്റ ക്ഷതത്തെ തുടർന്ന് തായ് ഗായികയ്ക്ക് ദാരുണാന്ത്യം. പ്രമുഖ ഗായികയായ 20-കാരി ചയാദ പ്രാവോ ഹോം ആണ് മരിച്ചത്. കഴുത്തിലെ മസാജ് തലച്ചോറിലേക്ക് രക്തമെത്തിക്കുന്ന ധമനികൾക്ക് തകരാർ ഉണ്ടാക്കിയതാണ് മരണകാരണം. രക്തത്തിലെ അണുബാധയും തലച്ചോറിലെ വീക്കത്തെയും തുടർന്ന് ചികിത്സയിലായിരുന്നു.തോൾ വേദനയെ തുടർന്നാണ് 20-കാരി മസാജിനായി പാർലറിലെത്തിയത്.
ഒക്ടോബർ മാസത്തിലായിരുന്നു ഇത്. കഴുത്തിന് ബലത്തിലുള്ള മസാജുകളാണ് നൽകിയത്. ആദ്യ ദിവസം തന്നെ ചയാദയ്‌ക്ക് പിൻ കഴുത്തിൽ വേദന അനുഭവപ്പെട്ടിരുന്നു. രണ്ടാം ദിവസം ശരീരത്തിലാകെ കഠിനമായ വേദന അനുഭവപ്പെട്ടു. രണ്ടാഴ്ച കൊണ്ട് അനങ്ങാൻ കഴിയാത്ത അവസ്ഥയിലായി ഗായികയെന്നാണ് റിപ്പോർട്ട്. പിന്നാലെ വലതുകൈയുടെ സ്വാധീനം നഷ്ടപ്പെട്ടു.
നവംബർ പകുതിയോടെ 50 ശതമാനത്തിലേറെ തളർന്നു. ഇതിന് പിന്നാലെ നടത്തിയ പരിശോധനയിലാണ് രക്തത്തിൽ അണുബാധയുണ്ടായതായും മസ്തിഷ്കത്തിൽ വീക്കമുള്ളതായും കണ്ടെത്തിയത്. അതീവ ഗുരതരാവസ്ഥയിൽ കഴിയുന്നതിനിടയിലാണ് മരണം. സംഭവത്തിന് പിന്നാലെ നടത്തിയ പരിശോധനയിൽ പാർലറിനെതിരെ നടപടി സ്വീകരിച്ചിട്ടുണ്ട്.പാർലറിലെ ഏഴ് മസാജർമാരിൽ രണ്ട് പേർക്ക് മാത്രമാണ് ലൈസൻസുള്ളതെന്ന ഞെട്ടിക്കുന്ന വാർത്തയാണ് പുറംലോകമറിഞ്ഞത്. ഏറെ സങ്കീർണമായ മസാജുകൾ നടത്തുന്നത് വൈദഗ്ധ്യം ഇല്ലാത്തവരാണെന്ന് ഇതോടെ ബോധ്യമായി. ചയോദയുടെ മരണത്തിൽ പാർലറിന്റെ ഉടമ അനുശോചനം അറിയിച്ചു.
കഴുത്തിന് കൂടുതൽ ബലം നൽകുന്നതും വളച്ചൊടിക്കുംവിധത്തിലുള്ള മസാജുകൾ തലച്ചോറിലേക്ക് രക്തമെത്തിക്കുന്ന ധമനികളെ സാരമായി ബാധിച്ചേക്കാമെന്ന് വിദഗ്ധർ മുന്നറിയിപ്പ് നൽകുന്നുണ്ട്. പേശികളുടെ ആരോഗ്യത്തെ ഇത് ബാധിക്കുന്നു, ചിലപ്പോൾ പക്ഷാഘാതത്തിലേക്ക് വരെ നയിക്കുന്നു.
