ബെംഗളൂരുവില്‍ 20 വയസ്സുള്ള കോളേജ് വിദ്യാർത്ഥി റോഡപകടത്തില്‍ മരിച്ചതിന് കാരണം കുഴികളാണെന്ന ബിജെപിയുടെ ആരോപണം കർണാടക ഉപമുഖ്യമന്ത്രി ഡി കെ ശിവകുമാർ ചൊവ്വാഴ്ച നിഷേധിച്ചു.വടക്കൻ ബെംഗളൂരുവിലെ അവലഹള്ളി പ്രദേശത്തെ കുഴി ഒഴിവാക്കാൻ ശ്രമിക്കുന്നതിനിടെ ടിപ്പർ ലോറിയുടെ ചക്രങ്ങള്‍ക്കടിയില്‍പ്പെട്ടാണ് അവസാന വർഷ ബി-കോം വിദ്യാർത്ഥിനിയായ ധനുശ്രീ മരിച്ചതെന്ന് ബിജെപി ആരോപിച്ചിരുന്നു. എന്നാല്‍ ആരോപണം തെറ്റാണെന്നും ബിജെപി വ്യാജ ആരോപണങ്ങള്‍ ഉന്നയിക്കുകയാണെന്നും ശിവകുമാർ പറഞ്ഞു.
ബെംഗളൂരു ഉള്‍പ്പെടെ കർണാടകയുടെ 60 ശതമാനം പ്രദേശവും കോണ്‍ഗ്രസ് സർക്കാരിന്റെ ദുർഭരണം മൂലം മരണക്കെണിയായി മാറിയിരിക്കുന്നുവെന്നും ബിജെപി ആരോപിച്ചു.സിലിക്കണ്‍ സിറ്റിയിലെ റോഡുകളിലെ കുഴിയില്‍ വീണ് ഒരു വിദ്യാർത്ഥിനി മരിച്ചത് നിർഭാഗ്യകരമാണ്. സുഗമമായ ഗതാഗതം സാധ്യമാക്കേണ്ടിയിരുന്ന ബെംഗളൂരുവിലെ റോഡുകള്‍, പകരം എല്ലാ ദിവസവും യാത്രക്കാരുടെ ജീവൻ അപകടത്തിലാക്കുകയാണെന്നും ഡി.കെ. ശിവകുമാറിന്റെ മോശം ഭരണമാണ് കാരണമെന്നും ബിജെപി ആരോപിച്ചു.
രാവിലെ 8:10 ഓടെ ധനുശ്രീ ബയപ്പനഹള്ളിയില്‍ നിന്ന് കെആർ പുരത്തുള്ള കോളേജിലേക്ക് ഇരുചക്രവാഹനത്തില്‍ പോകുമ്ബോഴാണ് അപകടം നടന്നതെന്ന് പൊലീസ് പറഞ്ഞു.പ്രാഥമിക അന്വേഷണത്തില്‍ കുട്ടി സഞ്ചരിച്ച വാഹനത്തിന് പിന്നില്‍ ടിപ്പർ ലോറി ഇടിച്ചതായും സംഭവസ്ഥലത്ത് തന്നെ മരണമടഞ്ഞതായും മുതിർന്ന പൊലീസ് ഉദ്യോഗസ്ഥൻ പറഞ്ഞു. അപകടത്തിന്റെ കൃത്യമായ ക്രമവും കാരണവും കണ്ടെത്തുന്നതിനായി സിസിടിവി ദൃശ്യങ്ങള്‍ പരിശോധിച്ചുവരികയാണെന്ന് പൊലീസ് പറഞ്ഞു.
