ന്യൂഡല്‍ഹി: ഓണ്‍ലൈന്‍ ഫുഡ് ഡെലിവറി പ്ലാറ്റ്‌ഫോമുകളായ സൊമാറ്റോയ്ക്കും സ്വിഗ്ഗിക്കും എതിരേ കോമ്ബറ്റീഷന്‍ കമ്മീഷന്‍ ഓഫ് ഇന്ത്യയുടെ അന്വേഷണം. നാഷണല്‍ റെസ്റ്റോറന്റ് അസോസിയേഷന്‍ ഓഫ് ഇന്ത്യ (എന്‍ആര്‍എഐ) ഉന്നയിക്കുന്ന ആശങ്കകള്‍ സംബന്ധിച്ചാണ് അന്വേഷണം.
ക്ലൗഡ് കിച്ചന്‍, പ്രൈവറ്റ് ലേബല്‍ എന്നിവ വഴി ഈ പ്ലാറ്റ്ഫോമുകള്‍ക്കുള്ള സാമ്ബത്തിക താല്‍പര്യങ്ങള്‍ നിഷ്പക്ഷതയെ ബാധിച്ചേക്കാമെന്ന വാദം കോംപറ്റീഷന്‍ കമ്മീഷന്‍ പരിഗണിക്കും. ഇക്കാര്യത്തില്‍ വിശദമായ പരിശോധന ആവശ്യമാണെന്നും കോമ്ബറ്റീഷന്‍ കമ്മീഷന്‍ ഓഫ് ഇന്ത്യ (സിസിഐ) അഭിപ്രായപ്പെട്ടു.
വിഷയത്തില്‍ വിരുദ്ധ താല്‍പ്പര്യം ഉള്ളതായി സിസിഐ ചൂണ്ടിക്കാട്ടി. “. സ്വിഗ്ഗി, സൊമാറ്റോ എന്നിവയുമായി ബന്ധപ്പെട്ട് പ്രഥമദൃഷ്ട്യാ വിരുദ്ധ താല്‍പ്പര്യം ഉള്ള സാഹചര്യം ഉടലെടുത്തിട്ടുണ്ടെന്ന് കമ്മീഷന്‍ അഭിപ്രായപ്പെടുന്നു. കാരണം ഡൗണ്‍സ്ട്രീം മാര്‍ക്കറ്റില്‍ വാണിജ്യ താല്‍പ്പര്യം നിലനില്‍ക്കുന്നതിനാല്‍, അവര്‍ നിഷ്പക്ഷ പ്ലാറ്റ്‌ഫോമുകളായി പ്രവര്‍ത്തിക്കുന്ന രീതിയെ ബാധിക്കാം,” സിസിഐ പറഞ്ഞു. 60 ദിവസത്തിനുള്ളില്‍ അന്വേഷണ റിപോര്‍ട്ട് സമര്‍പ്പിക്കാന്‍ സിസിഐ അന്വേഷണ വിഭാഗത്തിന് നിര്‍ദേശം നല്‍കി.
ക്ലൗഡ് കിച്ചണുകള്‍ നിര്‍മ്മിക്കാന്‍ സൊമാറ്റോ ഉപഭോക്തൃ ഡാറ്റ ഉപയോഗിച്ചുവെന്നും ചില ബ്രാന്‍ഡുകള്‍ക്ക് അധിക ഫീസുകള്‍ക്കോ വാടക കമ്മീഷനുകള്‍ക്കോ സൗകര്യങ്ങള്‍ വാഗ്‌ദാനം ചെയ്‌തെന്നും എന്‍ആര്‍എഐ ആരോപിച്ചിരുന്നു.. സ്വകാര്യ ലേബലുകളില്‍ നിന്നുള്ള വില്‍പ്പനയുടെ ഒരു ഭാഗം സ്വിഗ്ഗിക്കും സമാനമായി നേട്ടമുണ്ടാക്കിയെന്നും അങ്ങനെ ഉപഭോക്തൃ ട്രാഫിക്ക് വഴിതിരിച്ചുവിടാന്‍ പ്രോത്സാഹനം നല്‍കിയെന്നും എന്‍ആര്‍എഐ ആരോപിച്ചിരുന്നു.
