ഓണ്ലൈന് വഴിയുള്ള സാമ്പത്തിക തട്ടിപ്പുകള് ദിനംപ്രതി വാര്ത്തയാകുമ്പോഴും വിദ്യാസമ്പന്നര് ഉള്പ്പടെയുള്ളവർ ഇത്തരം തട്ടിപ്പുകള്ക്ക് ഇരയാകുന്നത് തുടരുകയാണ്. ചുരുങ്ങിയ ചെലവില് ഓണ്ലൈനിലൂടെ മുട്ട വാങ്ങാനൊരുങ്ങിയ ബെംഗളൂരു യുവതിക്ക് പറ്റിയ അക്കിടിയാണ് ഇപ്പോള് വാര്ത്തകളില് പുതുതായി ഇടം നേടിയിട്ടുള്ളത്. വസന്തനഗർ പ്രദേശത്തെ താമസക്കാരിയായ 38കാരിക്ക് ഫെബ്രുവരി 17നാണ് തട്ടിപ്പിലേക്ക് തയിച്ച പരസ്യം ഇമെയിലിൽ ലഭിച്ചത്. ഒരു ജനപ്രിയ സ്ഥാപനം വളരെ കുറഞ്ഞ വിലയ്ക്ക് മുട്ട വിൽക്കുന്നതായാണ് ഇതില് ഉണ്ടായിരുന്നത്. വിവിധ ഓഫറുകൾ അറിയാന് യുവതി പരസ്യം താഴേക്ക് സ്ക്രോൾ ചെയ്യുകയും ‘നാല് ഡസൻ മുട്ടകൾക്ക് 49 രൂപ’ എന്ന ഓഫര് തെരഞ്ഞെടുക്കുകയും ചെയ്തു. യുവതി തൻ്റെ കാർഡ് വിശദാംശങ്ങൾ നൽകി ഓർഡർ നൽകാൻ ക്ലിക്ക് ചെയ്തു.
തുടർന്ന് ക്രെഡിറ്റ് കാർഡുകൾ വഴിയുള്ള പണമടയ്ക്കൽ ഓപ്ഷനുകൾ മാത്രമേയുള്ളൂവെന്ന് അവര് മനസ്സിലാക്കി. പക്ഷേ പണമടക്കല് തുടര്ന്നതോടെ നഷ്ടമായത് 48,199 രൂപ.” ക്രെഡിറ്റ് കാര്ഡ് കാലഹരണപ്പെടുന്ന തീയതിയും സിവിവി നമ്പറും ഉൾപ്പെടെയുള്ള എൻ്റെ ക്രെഡിറ്റ് കാർഡ് വിശദാംശങ്ങൾ ഞാൻ നൽകി, പേയ്മെൻ്റിലേക്ക് തുടരുക എന്നതിൽ ക്ലിക്ക് ചെയ്തു. എൻ്റെ രജിസ്റ്റർ ചെയ്ത മൊബൈൽ നമ്പറിൽ എനിക്ക് ഒരു ഒടിപി ലഭിച്ചു. ഒടിപി നൽകുന്നതിന് മുമ്പ് തന്നെ എൻ്റെ ക്രെഡിറ്റ് കാർഡ് അക്കൗണ്ടിൽ നിന്ന് മൊത്തം 48,199 രൂപ ‘ഷൈൻ മൊബൈൽ എച്ച്യു’ എന്ന അക്കൗണ്ടിലേക്ക് കൈമാറ്റം ചെയ്യപ്പെട്ടു, ” തട്ടിപ്പിനിരയായ സ്ത്രീ പറഞ്ഞു.
പണമിടപാട് സംബന്ധിച്ച് ബാങ്കിൻ്റെ ക്രെഡിറ്റ് കാർഡ് സെക്ഷനിലെ ഉദ്യോഗസ്ഥരിൽ നിന്ന് യുവതിക്ക് ഒരു കോൾ ലഭിക്കുകയും പിന്നീട് സൈബർ ക്രൈം ഉദ്യോഗസ്ഥർ പ്രാദേശിക പോലീസ് സ്റ്റേഷനിൽ പരാതി നൽകാൻ നിർദ്ദേശിക്കുകയും ചെയ്തു. ഐടി ആക്ട് പ്രകാരം കേസ് രജിസ്റ്റർ ചെയ്ത് സംഭവത്തില് അന്വേഷണം നടത്തുകയാണ്.
