ബെംഗളൂരു: ബെംഗളൂരുവിൽ ശനിയാഴ്ച രാത്രി പെയ്ത ശക്തമായ മഴയിൽ പ്രധാന റോഡുകളിൽ വെള്ളക്കെട്ട്. ബെംഗളൂരുവിൻ്റെ തെക്ക്, കിഴക്കൻ മേഖലകളിലെ റോഡുകൾ പലതും വെള്ളത്തിൽ മുങ്ങിയതോടെ വൻ ഗതാഗതക്കുരുക്ക് രൂപപ്പെട്ടു. കേന്ദ്ര കാലാവസ്ഥ വകുപ്പിൻ്റെ റിപ്പോർട്ട് പ്രകാരം, ശനിയാഴ്ച 10.4 മില്ലിമീറ്റർ മഴ ബെംഗളൂരു നഗരത്തിൽ പെയ്തു. മഴയിൽ 15 മരങ്ങളും 44 ശിഖരങ്ങളും നിലംപതിച്ചു. ബെംഗളൂരു ഉൾപ്പെടുന്ന ബെംഗളൂരു അർബൻ ജില്ലയിൽ ഇന്ന് ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാൽ യെല്ലോ അലേർട്ട് പ്രഖ്യാപിച്ചു. ജില്ലയിൽ നാളെ മഴ മുന്നറിയിപ്പില്ല. മറ്റന്നാൾ യെല്ലോ അലേർട്ട് പ്രഖ്യാപിച്ചിട്ടുണ്ട്.
ശനിയാഴ്ച പെയ്ത മഴയിൽ കല്യാൺ നഗർ, ഇലക്ട്രോണിക് സിറ്റി, ബൊമ്മസാന്ദ്ര തുടങ്ങിയ മേഖലകളിലെ റോഡുകളിലാണ് വെള്ളം കയറിയത്. കല്യാൺ നഗറിലെ സർവീസ് റോഡുകളും അണ്ടർപാസുകളുമടക്കം വെള്ളത്തിലായെന്ന് എക്സ് ഉപയോക്താക്കൾ മുന്നറിയിപ്പ് നൽകി. റോഡുകളിൽ വെള്ളക്കെട്ട് രൂക്ഷമായതോടെ ബൊമ്മസാന്ദ്ര വ്യവസായ മേഖലയ്ക്ക് സമീപം കനത്ത ഗതാഗതക്കുരുക്കായി. ഇവിടെ ഒരു മണിക്കൂറിലധികം വാഹനങ്ങളുടെ നീണ്ടനിര രൂപപ്പെട്ടു.
ബെംഗളൂരു – മൈസൂരു റോഡ് വെള്ളത്തിലായതോടെ ഗതാഗക്കുരുക്ക് രൂക്ഷമായി. അപകടമൊഴിക്കാൻ ട്രാഫിക് പോലീസിൻ്റെ നേതൃത്വത്തിൽ വെള്ളക്കെട്ട് നീക്കി ഗതാഗതം പുനസ്ഥാപിച്ചു. വെറും 20 മിനിറ്റ് പെയ്ത മഴയിൽ ഇലക്ട്രോണിക് സിറ്റി ടോൾ വെള്ളത്തിൽ മുങ്ങിയെന്നും ഇതാണോ ഡികെ ശിവകുമാർ പറയുന്ന ‘ബ്രാൻഡ് ബെംഗളൂരു’ എന്നും എക്സിൽ ചോദ്യം ഉയർന്നു.
യെലഹങ്കയിലെ കേന്ദ്രീയ വിഹാർ അപ്പാർട്ട്മെൻ്റിൻ്റെ ബേസ്മെൻ്റിൽ വെള്ളം കയറിയതോടെ വാഹനങ്ങളും വെള്ളത്തിലായി. അപ്പാർട്ട്മെൻ്റിൻ്റെ ചുറ്റുമതിൽ തകർന്ന് യെലഹങ്ക തടാകത്തിൽ നിന്നുള്ള വെള്ളം അപ്പാർട്ടമെൻ്റ് പരിസരത്തേക്ക് കയറുകയായിരുന്നു. രാത്രിയിൽ ഏകദേശം നാലടി ഉയരത്തിൽ നിറഞ്ഞ വെള്ളം ബിബിഎംപി, എസ്ഡിആർഎഫ്, ഫയർ ഫോഴ്സ് ഉദ്യോഗസ്ഥരുടെ ശ്രമഫലമായി ഒരടി ഉയരത്തിലേക്ക് കുറച്ചു.
കർണാടക കാലാവസ്ഥ:06/10/2024: ഉത്തര കന്നഡ, ബെല്ലാരി, ദാവണഗെരെ, ഉഡുപ്പി, ചിക്മഗലുർ, തുംകുരു, ദക്ഷിണ കന്നഡ, ചിക്കബല്ലാപുർ, ഹാസൻ, കൊടഗു, മാണ്ഡ്യ, ബെംഗളൂരു റൂറൽ, ബെംഗളൂരു അർബൻ, മൈസൂരു, ചാമരാജ്നഗർ, രാമനഗർ
07/10/2024: ഉത്തര കന്നഡ, ഉഡുപ്പി, ചിക്മഗലുർ, ദക്ഷിണ കന്നഡ, ഹാസൻ, കൊടഗു, മൈസൂരു,
08/10/2024: ഉത്തര കന്നഡ, ബെല്ലാരി, ദാവണഗെരെ, ഉഡുപ്പി, ചിക്മഗലുർ, ചിത്രദുർഗ, തുംകുരു, ദക്ഷിണ കന്നഡ, ചിക്കബല്ലാപുർ, ഹാസൻ, കൊടഗു, മാണ്ഡ്യ, ബെംഗളൂരു റൂറൽ, ബെംഗളൂരു അർബൻ, മൈസൂരു, ചാമരാജ്നഗർ, രാമനഗർ
