ബെംഗളൂരു: ഐടി നഗരമായ ബെംഗളൂരുവിൻ്റെ ഗതാഗതം സുഗമമാക്കുന്ന ബെംഗളൂരു ബിസിനസ് കോറിഡോർ (ബിബിസി) പദ്ധതി 2029ല് പൂർത്തിയാക്കാൻ കർണാടക സർക്കാർ.മുൻപ് പെരിഫറല് റിങ് റോഡ് (പിആർആർ) എന്നറിയപ്പെട്ടിരുന്ന പദ്ധതി വർഷങ്ങളായി മുടങ്ങിക്കിടക്കുന്ന സാഹചര്യത്തിലാണ് പദ്ധതി പുനരുജ്ജീവിപ്പിക്കാൻ സർക്കാർ തീരുമാനിച്ചത്. 2007ല് വിജ്ഞാപനം ചെയ്ത പദ്ധതിയാണ് ബിബിസി.ബെംഗളൂരു ബിസിനസ് കോറിഡോർ പദ്ധതിയുമായി ബന്ധപ്പെട്ട പ്രവർത്തനം സംസ്ഥാന സർക്കാർ ആരംഭിച്ചു. തുമകുരു റോഡിനെ ബല്ലാരി റോഡ്, ഓള്ഡ് മദ്രാസ് റോഡ് വഴി ഹൊസൂർ റോഡുമായി ബന്ധിപ്പിക്കുന്ന 73 കിലോമീറ്റർ ദൈർഘ്യമുള്ള ബിബിസി ഇടനാഴി ബെംഗളൂരുവിലെ പ്രധാന റോഡുകളിലെ തിരക്ക് ലഘൂകരിക്കുന്നതിനുള്ള പ്രധാന പദ്ധതിയായിട്ടാണ് വിലയിരുത്തുന്നത്.27,000 കോടി രൂപ വിലയിരുത്തുന്ന ബെംഗളൂരു ബിസിനസ് കോറിഡോർ പദ്ധതിക്കുള്ള സാമ്ബത്തിക സഹായം ഭവന – നഗര വികസന കോർപറേഷനില് നിന്നുള്ള വായ്പയിലൂടെ കണ്ടെത്തും.
ബെംഗളൂരു നഗരത്തിലെ വഷളായിക്കൊണ്ടിരിക്കുന്ന ഗതാഗത പ്രതിസന്ധി പരിഹരിക്കുന്നതിനുള്ള സമ്മർദ്ദം രൂക്ഷമാകുമ്ബോഴും 2007ല് വിജ്ഞാപനം ചെയ്ത ബെംഗളൂരു ബിസിനസ് കോറിഡോർ എന്തുകൊണ്ട് പൂർത്തിയാക്കാനായില്ലെന്ന ചോദ്യം തുടരുന്ന സാഹചര്യത്തിലാണ് പദ്ധതിയുമായി സർക്കാർ മുന്നോട്ട് പോകുന്നത്. നിലവില് പദ്ധതിയുമായി ബന്ധപ്പെട്ട പ്രവർത്തനം വേഗത്തില് പുരോഗമിക്കുകയാണ്. ഭൂമി ഏറ്റെടുക്കല് വെല്ലുവിളി ഒരു പരിധിവരെ പരിഹരിക്കാനായെങ്കിലും നഷ്ടപരിഹാരം പര്യാപ്തമല്ലെന്ന് ആരോപിച്ച് ഭൂവുടമകള് പ്രതിഷേധവുമായി രംഗത്തെത്തി.മുൻ ഐഎഎസ് ഓഫീസ എല്കെ അതീഖിനെ പദ്ധതിയുടെ ചെയർമാനായി കൊണ്ടുവന്ന ശേഷമാണ് പദ്ധതി അതിവേഗത്തില് പുരോഗമിക്കാൻ ആരംഭിച്ചത്. ഇടനാഴിക്ക് ഏകദേശം 2,560 ഏക്കർ ആവശ്യമാണ്.
എന്നാല് നഷ്ടപരിഹാര തർക്കങ്ങള് കർഷകരില് നിന്നും ഭൂവുടമകളില് നിന്നും നിരന്തരമായ എതിർപ്പിന് കാരണമായി.2025 ഒക്ടോബറില് 100 മീറ്റർ വീതി എന്ന മുൻ രൂപകല്പ്പന 65 മീറ്ററായി മാറ്റിയ ബിസിനസ് ഇടനാഴിക്കുള്ള നിർദേശം മന്ത്രിസഭ അംഗീകരിച്ചു. ഇടനാഴിയിലെ ശേഷിക്കുന്ന 35 മീറ്റർ വീതി ഭൂമി നഷ്ടപ്പെടുന്നവർക്ക് നഷ്ടപരിഹാരം നല്കുന്നതിനും വാണിജ്യ പ്ലോട്ടുകള് കൊത്തിയെടുക്കുന്നതിനും ഉപയോഗിക്കാൻ തീരുമാനിച്ചു. പദ്ധതിയില് തുടങ്ങി ഘട്ടം ഘട്ടമായി നടപ്പിലാക്കാനാണ് ഇപ്പോള് ശ്രമിക്കുന്നത്. പദ്ധതിക്കായി ഏകദേശം 50 ശതമാനം ഭൂമി ഏറ്റെടുത്തിട്ടുണ്ടെന്ന് ഉദ്യോഗസ്ഥർ പറഞ്ഞു. പാക്കേജ് തിരിച്ച് മുന്നോട്ട് പോകുമെന്ന് ബിബിസി ചെയർമാൻ എല്കെ അതീഖ് പറഞ്ഞു. ടെൻഡറുകളുമായി മുന്നോട്ട് പോകുന്നതിന് കുറഞ്ഞത് 80 ശതമാനം ഭൂമിയെങ്കിലും ഉറപ്പാക്കേണ്ടതുണ്ട്.
