കഴിഞ്ഞ ദിവസമാണ് പ്രശസ്ത തമിഴ് നടന്‍ ജയം രവി ഭാര്യ ആരതിയുമായി വേര്‍പിരിയുകയാണെന്ന് ആരാധകരെ അറിയിച്ചത്. ഒരുപാട് ആലോചനകള്‍ക്കും ചര്‍ച്ചകള്‍ക്കും ശേഷമെടുത്ത തീരുമാനമാണെന്നും വ്യക്തിപരമായ കാര്യങ്ങളാണ് തീരുമാനത്തിന് പിന്നിലെന്നുമാണ് താരം എക്സില്‍ കുറിച്ചത്. എന്നാല്‍ ഇപ്പോള്‍ ജയം രവിക്കെതിരെ രംഗത്തെത്തിയിരിക്കുകയാണ് ആരതി. തന്‍റെ അറിവോ സമ്മതമില്ലാതെയാണ് വിവാഹമോചനമെന്ന് ആരതി ഇന്‍സ്റ്റഗ്രാമില്‍ പങ്കുവച്ച കുറിപ്പില്‍ പറയുന്നു.വിവാഹമോചനത്തെക്കുറിച്ച് രവി സമൂഹ മാധ്യമങ്ങളില്‍ പങ്കുവച്ച കുറിപ്പ് കണ്ടപ്പോള്‍ ഞെട്ടിപ്പോയെന്നും ആരതി കുറിച്ചു.
കഴിഞ്ഞ 18 വർഷമായി പരസ്പര വിശ്വാസത്തോടെയും ബഹുമാനത്തോടെയും ജീവിച്ചെങ്കിലും ജയം രവിയുടെ പ്രസ്താവനയോടെ അന്തസ്സും വ്യക്തിത്വവും നഷ്ടപ്പെട്ടതായി തനിക്ക് തോന്നുന്നുവെന്നും ആരതി പറയുന്നു.
ആരതിയുടെ കുറിപ്പ്“എൻ്റെ അറിവോ സമ്മതമോ ഇല്ലാതെ ഞങ്ങളുടെ വിവാഹമോചനത്തെക്കുറിച്ച് അടുത്തിടെ നടത്തിയ പരസ്യമായ പ്രഖ്യാപനം എന്നെ ഞെട്ടിക്കുകയും സങ്കടപ്പെടുത്തുകയും ചെയ്തു. 18 വര്‍ഷം പിന്നിട്ട ദാമ്പത്യ ജീവിതത്തില്‍ ഒരു സുപ്രധാന തീരുമാനമെടുക്കുമ്പോള്‍ അത് അര്‍ഹിക്കുന്ന പ്രാധാന്യത്തോടും സ്വകാര്യതയോടും കൂടി കൈകാര്യം ചെയ്യണമെന്ന് ഞാന്‍ വിശ്വസിക്കുന്നു.ഈയിടെയായി ഞാൻ എൻ്റെ ഭർത്താവുമായി സംസാരിക്കാനും അദ്ദേഹത്തെ കാണാനും പലതവണ ശ്രമിച്ചിട്ടുണ്ട്. പക്ഷെ സംസാരിക്കാന്‍ കഴിഞ്ഞില്ല. ഞാനും രണ്ടു കുട്ടികളും ഒന്നുമില്ലാതെ ബുദ്ധിമുട്ടുകയാണ്. വിവാഹത്തിൽ നിന്ന് പിന്മാറാനുള്ള ഈ തീരുമാനം പൂർണമായും സ്വന്തം ഇഷ്ടപ്രകാരമാണ്.
അല്ലാതെ വീട്ടുകാരുടെ താൽപര്യത്തിന് വേണ്ടിയല്ല. വളരെ വേദനാജനകമായ ഈ അവസ്ഥയിൽ, പരസ്യമായി ഇതേക്കുറിച്ച് അഭിപ്രായം പറയുന്നതിൽ നിന്ന് വിട്ടുനിൽക്കാൻ ഞാനാഗ്രഹിക്കുന്നു. പക്ഷേ, എന്നെ കുറ്റപ്പെടുത്തിയും, എൻ്റെ പെരുമാറ്റത്തെ അപകീർത്തിപ്പെടുത്തുന്ന പരസ്യമായ പരോക്ഷമായ ആക്രമണങ്ങള്‍ സഹിക്കാവുന്നതിലപ്പുറമാണ്. ഒരു അമ്മയെന്ന നിലയിൽ, എൻ്റെ പ്രഥമ പരിഗണന എപ്പോഴും എൻ്റെ കുട്ടികളുടെ ക്ഷേമത്തിനായിരിക്കും.
ആരോപണങ്ങള്‍ വരുമ്പോള്‍ എനിക്ക് മാറിനില്‍ക്കാന്‍ സാധിക്കില്ല. ഇത് ഞാന്‍ അംഗീകരിച്ചുകൊടുക്കില്ല. ഈ ദുഷ്‌കരമായ സമയത്ത് എൻ്റെ കുട്ടികൾക്കൊപ്പം നിൽക്കുകയും അവർക്ക് ആവശ്യമായ ധൈര്യവും ധൈര്യവും നൽകുകയും ചെയ്യേണ്ടത് എൻ്റെ പ്രാഥമിക കടമയാണ്.ഒരു പക്ഷപാതവുമില്ലാതെ കാലം വസ്തുതകൾ വെളിപ്പെടുത്തുമെന്ന് ഞാന്‍ പൂർണമായും വിശ്വസിക്കുന്നു. ഞാനും കുട്ടികളും ഈ പ്രയാസകരമായ സമയത്തിലൂടെ കടന്നുപോകുമ്പോൾ ഞങ്ങളുടെ വ്യക്തിപരമായ വികാരങ്ങളെ മാനിക്കാൻ താഴ്മയോടെ അപേക്ഷിക്കുന്നു.
2009 ജൂണ്‍ 4നായിരുന്നു നിര്‍മാതാവായ സുജാത വിജയകുമാറിന്റെ മകളായ ആരതിയും നടന്‍ ജയം രവിയും വിവാഹിതരാകുന്നത്. പ്രശസ്ത തമിഴ് ചലച്ചിത്ര എഡിറ്ററായ മോഹന്‍റെ മകനാണ് ജയംരവി. താരം സിനിമയില്‍ തിളങ്ങി നിന്ന സമയത്തായിരുന്നു വിവാഹം. രണ്ട് ആണ്‍മക്കളും ഇവര്‍ക്കുണ്ട്.ജയം രവിയും ആരതിയും തമ്മില്‍ വേര്‍പിരിയുകയാണെന്ന് കഴിഞ്ഞ കുറച്ചു നാളുകളായി വാര്‍ത്തകള്‍ പടര്‍ന്നിരുന്നു. ജൂണില്‍ 15-ാം വിവാഹവാര്‍ഷിക വേളയില്‍ ആരതി രവിയോടൊപ്പമുള്ള ചിത്രങ്ങള്‍ ഇന്‍സ്റ്റഗ്രാമില്‍ നിന്നും നീക്കം ചെയ്തിരുന്നു. ജയം രവി ചെന്നൈ കുടുംബ കോടതിയില്‍ വിവാഹ മോചനക്കേസ് ഫയല്‍ ചെയ്തുവെന്നാണ് റിപ്പോര്‍ട്ട്. കേസ് ഒക്ടോബര്‍ 10ന് പരിഗണിക്കും.
