ഓടിക്കൊണ്ടിരുന്ന തീവണ്ടിയിൽനിന്ന് വീണ് ദമ്പതിമാർ മരിച്ചു

ചെന്നൈ : ഓടിക്കൊണ്ടിരുന്ന തീവണ്ടിയിൽനിന്നുവീണ് ദമ്പതിമാർ മരിച്ചു. കള്ളക്കുറിച്ചി അയ്യനാർ പാളയം സ്വദേശി ശിവകണ്ഠൻ (37), ഭാര്യ കലൈയരസി (30) എന്നിവരാണ് മരിച്ചത്. മുംബൈയിൽ താമസിക്കുന്ന ഇവർ ബന്ധുവിൻ്റെ ശവസംസ്കാരച്ചടങ്ങിൽ പങ്കെടുക്കാൻ ദാദർ എക്സ്പ്രസിൽ വരുകയായിരുന്നു.ബുധനാഴ്ച പുലർച്ചെ കോച്ചിൻ്റെ വാതിലിൽ നിൽക്കുകയായിരുന്നു ശിവകണ്ഠനും ഭാര്യയും. ഈ സമയം ശിവകണ്ഠൻ വഴുതി വീണു. ഇയാളെ രക്ഷിക്കാൻ ശ്രമിക്കുന്നതിനിടയിൽ കലൈയരസിയും വീണു. ഇരുവരും സംഭവസ്ഥലത്തുതന്നെ മരിച്ചു. സഹയാത്രികരും നാട്ടുകാരും റെയിൽവേ പോലീസിനെ വിവരമറിയിച്ചു. തുടർന്ന് പോലീസ് ഇരുവരുടെയും മൃതദേഹം പോസ്റ്റ്മോർട്ടത്തിനായി വെല്ലൂർ സർക്കാർ ആശുപത്രി യിലേക്ക് മാറ്റി.