ബെംഗളൂരു : ഓൺലൈൻ ടാക്സി കമ്പനികളായ ഒല, ഉബർ എന്നിവയ്ക്ക് പകരമായി ബെംഗളൂരുവിലെ ഓട്ടോത്തൊഴിലാളി യൂണിയൻ ആരംഭിച്ച ‘നമ്മ യാത്രി’ ആപ്പിന് മികച്ച പ്രതികരണം. നാലുമാസം കൊണ്ട് 5.6 കോടി രൂപ വരുമാനം യൂണിയൻ ഭാരവാഹികൾ അറിയിച്ചു.നിലവിൽ 41112 ഡ്രൈവർമാരും 335653 യാത്രക്കാരും ആപ്പിൽ രജിസ്റ്റർ ചെയ്തിട്ടുണ്ട്.മഹാദേവപുര, ബ്യാട്രായനപുര, രാജരാജേശ്വരിനഗർ, ബെംഗളൂരു സൗത്ത്, ബൊമ്മനഹള്ളി എന്നിവിടങ്ങളിലാണ് കൂടുതൽ പേർ നമ്മ യാത്രി ആപ്പ് ഉപയോഗിക്കുന്നത്.
ബെംഗളൂരുവിൽ ദിവസം ശരാശരി 9000 ട്രിപ്പുകൾ പൂർത്തിയാക്കുന്നുണ്ട്. ഇടനിലക്കാരില്ലാതെ കൂടുതൽ പണം ഡ്രൈവർമാർക്ക് ലഭിക്കുമെന്നതാണ് നമ്മ യാത്രി ആപ്പിന്റെ മെച്ചം.ബെംഗളൂരുവിലെ ഓട്ടോ തൊഴിലാളി യൂണിയനായ ‘ഓട്ടോറിക്ഷാ ഡ്രൈവേഴ്സ് യൂണിയനാണ് (എ.ആർ.ഡി.യു.) ആപ്പ് ഇറക്കിയത്.സേവനത്തിൽ സുതാര്യത ഉറപ്പുവരുത്തുന്നുണ്ടെന്നും ലഭ്യമായ ഡ്രൈവർമാരുടെ എണ്ണവും നഗരത്തിൽ ഏറ്റവും കൂടുതൽ ട്രിപ്പുകൾ പോകുന്ന സ്ഥലവുമെല്ലാം ആപ്പിൽ കാണാൻ സാധിക്കുമെന്നും രുദ്രമൂർത്തി പറഞ്ഞു.
രുദ്രമൂർത്തിയുടെ നേതൃത്വത്തിലാണ് നമ്മ യാത്രി ആപ്പിന് രൂപം നൽകിയത്.നിലവിൽ സർക്കാർ നിശ്ചയിച്ചിട്ടുള്ള മിനിമം നിരക്കായ 30 രൂപയ്ക്കു പുറമേ പത്തു രൂപ ബുക്കിങ് ചാർജും ഈടാക്കുന്നുണ്ട്.രണ്ടുകിലോമീറ്റർ യാത്രയ്ക്ക് 40 രൂപയാണ് ചെലവാകുന്നത്.
ഓൺലൈൻ ടാക്സി കമ്പിനകളായ ഒല, ഉബർ, റാപ്പിഡോ എന്നിവ ഓട്ടോ ടാക്സികൾക്ക് അമിത നിരക്ക് ഈടാക്കുന്നുവെന്നും ഡ്രൈവർമാരെ ചൂഷണം ചെയ്യുന്നുവെന്നുമുള്ള ആരോപണങ്ങൾ നേരത്തേ ഉയർന്നിരുന്നു.ഇതേത്തുടർന്നാണ് സ്വന്തമായി മൊബൈൽ ആപ്ലിക്കേഷൻ തുടങ്ങാൻ യൂണിയൻ തീരുമാനിച്ചത്.ഇൻഫോസിസ് സഹ സ്ഥാപകൻ നന്ദൻ നിലേകനിയുടെ കീഴിലുള്ള സ്ഥാപനമാണ് ‘നമ്മ യാത്രി’ ആപ്ലിക്കേഷൻ നിർമിച്ചത്.
പനി ബാധിതരുടെ എണ്ണം ഉയരുന്നു; എച് 3 എന്‍ 2 വൈറസ് സാന്നിധ്യവും; നിരീക്ഷണം ശക്തമാക്കി ആരോഗ്യ വകുപ്പ്
തിരുവനന്തപുരം: സംസ്ഥാനത്ത് പനി ബാധിതരുടെ എണ്ണം കൂടുന്നു. എച് 3 എൻ 2 വൈറസ് സാന്നിധ്യവും സ്ഥിരീകരിച്ചിട്ടുണ്ട്. ഇതോടെ എല്ലാ ജില്ലകളിലും ആരോഗ്യ വകുപ്പ് നിരീക്ഷണം ശക്തമാക്കാൻ നിർദ്ദേശം നൽകി. പനിക്കൊപ്പം ഒരാഴ്ച വരെ നീണ്ടുനിൽക്കുന്ന ചുമ, ശ്വാസതടസം തുടങ്ങിയ ലക്ഷണങ്ങളോടെ ചികിത്സ തേടുന്നവരുടെ എണ്ണവും കൂടി വരുന്നു.കഴിഞ്ഞ ആറ് ദിവസത്തിനിടെ 34,137 പേരാണ് ചികിത്സ തേടിയത്. 35 പേർക്ക് എലിപ്പനി സ്ഥിരീകരിച്ചു.
എലിപ്പനി ബാധിച്ച് ഒരാളും ചെള്ള് പനി ബാധിച്ച് മറ്റൊരാളും സംസ്ഥാനത്ത് മരിച്ചു. ആറ് പേരാണ് നിലവിൽ ചെള്ള് പനിക്ക് ചികിത്സയിലുള്ളത്. 344 പേർക്ക് ചിക്കൻ പോക്സ് സ്ഥിരീകരിച്ചിട്ടുണ്ട്. 164 ഡെങ്കിപ്പനി ബാധിതരുണ്ട്. നാല് പേർക്ക് എച് 1 എൻ 1 ബാധിച്ചു. മെഡിക്കൽ ഗവേഷണ കൗൺസിൽ കഴിഞ്ഞ ദിവസം സ്ഥിരീകരിച്ച ഇൻഫ്ളുവൻസ എഎച്ച് 3 എൻ 2 വൈറസ് സാന്നിധ്യം ഏതാനും ജില്ലകളിൽ റിപ്പോർട്ട് ചെയ്തിട്ടുണ്ടെങ്കിലും വൈറസ് സാന്നിധ്യം വ്യാപകമല്ലെന്നാണ് അധികൃതർ പറയുന്നത്.
ഏതൊക്കെ ജില്ലകളിലാണ് വൈറസ് ബാധയെന്ന് ഔദ്യോഗികമായി വെളിപ്പെടുത്തിയിട്ടില്ല.എച്ച് 1 എൻ 1 പോലെയുള്ള രോഗലക്ഷണങ്ങളുമായി എത്തുന്നവർക്ക് ഒസൾട്ടാമിവിർ പോലെയുള്ള മരുന്ന് നൽകാൻ നിർദേശിച്ചിട്ടുണ്ട്. കോവിഡ് ലക്ഷണങ്ങളോടെ ചികിത്സ തേടുന്നവരിൽ നിന്നുള്ള സാമ്പിൾ ജനിതക ശ്രേണീകരണത്തിന് ആരോഗ്യ വകുപ്പ് ശേഖരിക്കുന്നുണ്ട്. സാമ്പിളുകളിൽ നടത്തിയ തുടർ പരിശോധനയിലാണ് എച്ച് 3 എൻ 2 സാന്നിധ്യം കണ്ടെത്തിയിട്ടുള്ളത്.
എല്ലാ ജില്ലയിലും പനി ബാധിതരുടെ എണ്ണം കൂടുന്നതായി ആരോഗ്യ വകുപ്പ് സ്ഥിരീകരിച്ചു.പനി ബാധിതർ ജാഗ്രത പാലിക്കണമെന്നും സ്വയം ചികിത്സ നടത്തരുതെന്നും ആരോഗ്യ വകുപ്പ് നിർദേശിച്ചു. ഹോസ്റ്റലുകൾ, ആളുകൾ കൂട്ടമായി താമസിക്കുന്ന ഇടങ്ങൾ എന്നിവിടങ്ങളിലാണ് പെട്ടെന്ന് രോഗം പകരുന്നത്. കുടിവെള്ളം കൃത്യമായി മൂടിവെക്കണം. മുറിക്കുള്ളിൽ സൂക്ഷിച്ചിട്ടുള്ള ചെടിപ്പാത്രങ്ങളിൽ വെള്ളം കെട്ടിനിൽക്കുന്നില്ലെന്ന്‌ ഉറപ്പാക്കണം.
