ബംഗളുരു :തിരക്കേറിയ സെൻട്രൽ ബിസിനസ് ഡിസ്ട്രിക്റ്റിലെ (സിബിഡി) കാമരാജ് റോഡിലെ താമസക്കാർ തുടർച്ചയായ ജലവിതരണ പ്രശ്നങ്ങൾ നേരിടുന്നു. കഴിഞ്ഞ മാസം 15 ദിവസത്തോളം സിവിൽ ജോലികൾ കാരണം പ്രദേശത്തെ ജലവിതരണം തടസ്സപ്പെട്ടിരുന്നു, അതേസമയം തങ്ങൾക്ക് ലഭിക്കുന്ന വെള്ളം മലിനമാണെന്ന് പ്രദേശവാസികൾ തിങ്കളാഴ്ച പരാതിപ്പെട്ടു.
“കഴിഞ്ഞ മാസം, ഒന്നിലധികം അഭ്യർത്ഥനകൾക്കും പരാതികൾക്കും പ്രതിഷേധങ്ങൾക്കും ശേഷം, BWSSB (ബാംഗ്ലൂർ വാട്ടർ സപ്ലൈ ആൻഡ് സ്വീവറേജ് ബോർഡ്) ഉദ്യോഗസ്ഥർ പ്രദേശം സന്ദർശിച്ച് പൈപ്പ് ലൈനുകൾ പരിശോധിച്ചു. ഇപ്പോൾ, കഴിഞ്ഞ അഞ്ച് ദിവസമായി ഞങ്ങൾക്ക് ലഭിക്കുന്നത് മലിനമായ വെള്ളമാണെന്നും ഉദ്യോഗസ്ഥരുടെ പുറകെ ഓടാന് കഴിയുന്നില്ലെന്ന് ഒരു പ്രദേശവാസി പറഞ്ഞു.
മലിനജലം കാരണം ഒരാളെ ആശുപത്രിയിൽ പ്രവേശിപ്പിച്ചതായും പലർക്കും വയറിളക്കം ഉണ്ടെന്നും താമസക്കാർ അവകാശപ്പെട്ടു. ബിഡബ്ല്യുഎസ്എസ്ബി ഉദ്യോഗസ്ഥർ, ശനിയാഴ്ച സ്ഥലം സന്ദർശിച്ച് രണ്ട് പൈപ്പ് ലൈനുകൾ വൃത്തിയാക്കി.
“ശനിയാഴ്ച ഞങ്ങൾ പ്രദേശം സന്ദർശിച്ച് കണക്ഷനുകൾ പരിശോധിച്ചു. പഴയ പൈപ്പ്ലൈൻ ആയതിനാൽ കുറച്ച് തകരാർ ഉണ്ടായിട്ടുണ്ടാകാം. അടുത്ത രണ്ട് മൂന്ന് ദിവസത്തിനുള്ളിൽ മുഴുവൻ സംവിധാനവും ഞങ്ങൾ ശരിയാക്കും,” ഉദ്യോഗസ്ഥർ ഇതിനെ കുറിച് പ്രതികരിച്ചു.
പൗരന്മാർക്ക് ബുദ്ധിമുട്ട് ഉണ്ടാകാതിരിക്കാൻ ടാങ്കറുകൾ വെള്ളം വിതരണം ചെയ്യാൻ വിന്യസിച്ചിട്ടുണ്ട്. സംഭരിച്ച വെള്ളം ഉപയോഗിക്കുന്നത് നിർത്താൻ ഞങ്ങൾ പ്രദേശവാസികളോട് നിർദ്ദേശിച്ചിട്ടുണ്ടെന്നും പ്രദേശത്തേക്കുള്ള ജലവിതരണം നിർത്തിവച്ചെന്നും ഒരു എഞ്ചിനീയർ വ്യക്തമാക്കി.
