വിദേശ രാജ്യങ്ങളില്‍ നിന്നുള്ള ഡ്രൈവിംഗ് ലൈസന്‍സുള്ളവര്‍ക്ക് വീണ്ടും പരീക്ഷയില്ലാതെ വാഹനം ഓടിക്കാന്‍ കേരളം അനുമതി നല്‍കും. വിദേശ രാജ്യങ്ങളില്‍ നിന്ന് ഓട്ടോമാറ്റിക് വാഹനങ്ങള്‍ ഓടിക്കുന്നതിന് ലൈസന്‍സുള്ളവര്‍ കേരളത്തില്‍ ഡ്രൈവിംഗ് ടെസ്റ്റ് പാസാകേണ്ടതില്ല എന്നും അവരുടെ വിദേശ ലൈസന്‍സ് പരിഗണിച്ച്‌ പുതിയ ലൈസന്‍സ് നല്‍കും എന്നും ആണ് റിപ്പോര്‍ട്ടുകള്‍.
ഇതുവരെ, വിദേശ ലൈസന്‍സുള്ളവര്‍ ഗിയര്‍ ഉപയോഗിച്ച്‌ വാഹനങ്ങള്‍ ഓടിക്കേണ്ട ഡ്രൈവിംഗ് ടെസ്റ്റില്‍ വിജയിക്കണമായിരുന്നു. കൂടാതെ സംസ്ഥാനത്ത് ഡ്രൈവിംഗ് ടെസ്റ്റിന് ഓട്ടോമാറ്റിക് വാഹനങ്ങള്‍ ഉപയോഗിക്കുന്നില്ല. മോട്ടോര്‍ വെഹിക്കിള്‍ ഡിപ്പാര്‍ട്ട്‌മെന്റ് (എംവിഡി) തങ്ങള്‍ക്ക് ലഭിച്ച പരാതികളെക്കുറിച്ച്‌ റോഡ് ഗതാഗത, ഹൈവേ മന്ത്രാലയത്തെ അറിയിച്ചിരുന്നു. ഇതിന് മറുപടിയായി, ഡ്രൈവിംഗ് ടെസ്റ്റുകള്‍ നടത്തുന്നതില്‍ ഇന്ധനമോ ട്രാന്‍സ്മിഷനോ പ്രശ്നമല്ലെന്ന് മന്ത്രാലയം അറിയിച്ചു. എന്നാല്‍, ഓട്ടോമാറ്റിക് കാറുകള്‍ പരീക്ഷണത്തിന് അനുവദിക്കുന്ന കാര്യത്തില്‍ കേരളം ഇതുവരെ തീരുമാനമെടുത്തിട്ടില്ല എന്നാണ് റിപ്പോര്‍ട്ടുകള്‍.
