16 വയസ്സില്‍ താഴെയുള്ളവർക്ക് സോഷ്യല്‍ മീഡിയ പ്ലാറ്റ്‌ഫോമുകള്‍ ഉപയോഗിക്കുന്നതിന് കർശന നിരോധനം ഏർപ്പെടുത്തിയ ഓസ്‌ട്രേലിയൻ സർക്കാരിന്റെ നടപടി പൂർണ്ണമായി ലക്ഷ്യം കാണുന്നില്ലെന്ന് പുതിയ റിപ്പോർട്ടുകള്‍.നിരോധനം നിലവില്‍ വന്ന് രണ്ട് മാസത്തിന് ശേഷവും 13-നും 15-നും ഇടയില്‍ പ്രായമുള്ള കൗമാരക്കാരില്‍ അഞ്ചിലൊരാള്‍ ഇപ്പോഴും സോഷ്യല്‍ മീഡിയ ആപ്പുകള്‍ ഉപയോഗിക്കുന്നുണ്ടെന്നാണ് പുതിയ കണക്കുകള്‍ സൂചിപ്പിക്കുന്നത്. പ്രമുഖ പാരന്റല്‍ കണ്‍ട്രോള്‍ സോഫ്റ്റ്‌വെയർ നിർമ്മാതാക്കളായ ‘ക്യുസ്റ്റോഡിയോ’ (Qustodio) പുറത്തുവിട്ട റിപ്പോർട്ടിലാണ് ഈ ഞെട്ടിക്കുന്ന വിവരങ്ങളുള്ളത്.
നിരോധനത്തിന് ശേഷമുള്ള അവസ്ഥകഴിഞ്ഞ ഡിസംബറിലാണ് ലോകത്തിന് തന്നെ മാതൃകയാകുമെന്ന് കരുതിയ സോഷ്യല്‍ മീഡിയ നിരോധനം ഓസ്‌ട്രേലിയ നടപ്പിലാക്കിയത്. പ്രായപൂർത്തിയാകാത്തവരെ പ്ലാറ്റ്‌ഫോമുകളില്‍ നിന്ന് ഒഴിവാക്കാൻ കമ്പനികള്‍ക്ക് കൃത്യമായ നിർദ്ദേശം നല്‍കിയിരുന്നു. എന്നാല്‍ ഫെബ്രുവരിയിലെ കണക്കുകള്‍ പ്രകാരം, പ്രായപരിശോധന സംവിധാനങ്ങളെ മറികടന്ന് വലിയൊരു വിഭാഗം കുട്ടികള്‍ ഇപ്പോഴും ടിക് ടോക്, സ്നാപ്ചാറ്റ് തുടങ്ങിയ ആപ്പുകളില്‍ സജീവമാണ്.ക്യുസ്റ്റോഡിയോയുടെ റിപ്പോർട്ട് പ്രകാരം. നവംബറിനും ഫെബ്രുവരിക്കും ഇടയില്‍ സ്നാപ്ചാറ്റ് ഉപയോഗിക്കുന്ന 13-15 പ്രായക്കാരുടെ എണ്ണത്തില്‍ 13.8 ശതമാനത്തിന്റെ കുറവുണ്ടായെങ്കിലും, ഇപ്പോഴും 20.3 ശതമാനം കുട്ടികള്‍ ഇത് ഉപയോഗിക്കുന്നുണ്ട്. ടിക് ടോക് ഉപയോഗിക്കുന്നവരുടെ എണ്ണത്തില്‍ 5.7 ശതമാനത്തിന്റെ കുറവ് രേഖപ്പെടുത്തി. എങ്കിലും 21.2 ശതമാനം കൗമാരക്കാർ ഇപ്പോഴും ഈ പ്ലാറ്റ്‌ഫോമിലുണ്ടെന്ന് റിപ്പോർട്ട് ചൂണ്ടികാണിക്കുന്നു.ലോഗിൻ ചെയ്യാതെ തന്നെ ഉപയോഗിക്കാമെന്ന നിയമപരമായ ഇളവുള്ളതിനാല്‍ യൂട്യൂബിന്റെ ഉപയോഗത്തില്‍ വലിയ മാറ്റമുണ്ടായിട്ടില്ല. 36.9 ശതമാനം കൗമാരക്കാരാണ് യൂട്യൂബ് ഉപയോഗിക്കുന്നത്.പ്രായപരിശോധനയിലെ പാളിച്ചകള്‍നിരോധനം ലംഘിക്കുന്ന പ്ലാറ്റ്‌ഫോമുകള്‍ക്ക് 49.5 ദശലക്ഷം ഓസ്‌ട്രേലിയൻ ഡോളർ, ഏകദേശം 35 ദശലക്ഷം യുഎസ് ഡോളർ വരെ പിഴ ചുമത്താൻ നിയമത്തില്‍ വ്യവസ്ഥയുണ്ട്.
മെറ്റയുടെ ഇൻസ്റ്റാഗ്രാം, ഫേസ്ബുക്ക്, ത്രെഡ്‌സ്, ഗൂഗിളിന്റെ യൂട്യൂബ്, ടിക് ടോക്, സ്നാപ്ചാറ്റ് എന്നിവയെല്ലാം ഈ നിയമത്തിന്റെ പരിധിയില്‍ വരുന്നു. കുട്ടികള്‍ ഇപ്പോഴും പ്ലാറ്റ്‌ഫോമുകളില്‍ തുടരുന്നത് കമ്പനികളുടെ പ്രായപരിശോധന രീതികളുടെ പോരായ്മയിലേക്കാണ് വിരല്‍ ചൂണ്ടുന്നത്. പല പ്ലാറ്റ്‌ഫോമുകളും കുട്ടികളെ തിരിച്ചറിയുന്നതില്‍ പരാജയപ്പെടുന്നുണ്ടോ എന്ന കാര്യം ഇന്റർനെറ്റ് റെഗുലേറ്ററായ ‘ഇ-സേഫ്റ്റി കമ്മീഷണർ’ പരിശോധിച്ചു വരികയാണ്. നിയമലംഘനം നടത്തുന്ന കമ്പനികള്‍ക്കെതിരെ കർശന നടപടി ഉണ്ടാകുമെന്ന് റെഗുലേറ്റർ വക്താവ് അറിയിച്ചു.മാറ്റത്തിന് സമയം വേണ്ടിവരുംസോഷ്യല്‍ മീഡിയ പ്രായപരിധി വർദ്ധിപ്പിക്കുക എന്നത് പെട്ടെന്ന് നടപ്പിലാക്കാവുന്ന ഒന്നല്ലെന്നും അതൊരു വലിയ ‘സാംസ്കാരിക മാറ്റമാണെന്നും’ ഓസ്‌ട്രേലിയൻ കമ്മ്യൂണിക്കേഷൻസ് മന്ത്രി അനിക വെല്‍സിന്റെ വക്താവ് പ്രതികരിച്ചു. ഇതിന് കൃത്യമായ സമയം വേണ്ടിവരുമെന്നാണ് സർക്കാരിന്റെ നിലപാട്. ഓസ്‌ട്രേലിയയിലെ വേനല്‍ക്കാല അവധിക്കാലത്ത് സ്വാഭാവികമായും സോഷ്യല്‍ മീഡിയ ഉപയോഗം കുറയാറുണ്ട്. എന്നാല്‍ ഇത്തവണത്തെ ഇടിവ് നിരോധനം മൂലമാണെന്ന് ക്യുസ്റ്റോഡിയോ വ്യക്തമാക്കുന്നു. എങ്കിലും ജനുവരിക്ക് ശേഷം ഈ ഉപയോഗം വീണ്ടും പതുക്കെ വർദ്ധിക്കുന്നതായും റിപ്പോർട്ട് ചൂണ്ടിക്കാട്ടുന്നു.മറ്റ് പ്ലാറ്റ്‌ഫോമുകളിലേക്കുള്ള മാറ്റംനിരോധനം വന്നതോടെ കുട്ടികള്‍ നിയന്ത്രണമില്ലാത്ത മറ്റ് പ്ലാറ്റ്‌ഫോമുകളിലേക്ക് ചേക്കേറുമെന്ന് വലിയ ആശങ്ക ഉണ്ടായിരുന്നു.
എന്നാല്‍ നിലവില്‍ അത്തരമൊരു പ്രവണത ദൃശ്യമല്ല. അതേസമയം, വാട്സാപ്പ് ഉപയോഗിക്കുന്ന കുട്ടികളുടെ എണ്ണത്തില്‍ നേരിയ വർദ്ധനവ് രേഖപ്പെടുത്തിയിട്ടുണ്ട്. നിരോധനത്തില്‍ നിന്ന് വാട്സാപ്പിനെ ഒഴിവാക്കിയിട്ടുള്ളതും ഒരു കാരണമാണ്.രക്ഷിതാക്കളുടെ പങ്ക്രക്ഷിതാക്കള്‍ ആക്സസ് ബ്ലോക്ക് ചെയ്യാത്ത ഇടങ്ങളില്‍ കുട്ടികള്‍ ഇപ്പോഴും ഇത്തരം പ്ലാറ്റ്‌ഫോമുകള്‍ ഉപയോഗിക്കുന്നുണ്ടെന്നാണ് ഡാറ്റ വ്യക്തമാക്കുന്നത്. പലപ്പോഴും പ്രായം തെറ്റായി നല്‍കിയോ മറ്റ് മാർഗങ്ങളിലൂടെയോ ആണ് കുട്ടികള്‍ അകത്തു കടക്കുന്നത്. ഈ നിയമം എത്രത്തോളം ഫലപ്രദമാണെന്ന് പരിശോധിക്കാൻ ഗവണ്‍മെന്റും സർവ്വകലാശാലകളും സ്വന്തം നിലയില്‍ പഠനങ്ങള്‍ നടത്തി വരികയാണ്. വരും മാസങ്ങളില്‍ ഈ റിപ്പോർട്ടുകള്‍ കൂടി പുറത്തു വരുന്നതോടെ നിരോധനത്തിന്റെ കൃത്യമായ ചിത്രം വ്യക്തമാകും.ലോകമെമ്പാടുമുള്ള പല രാജ്യങ്ങളും ഓസ്‌ട്രേലിയയുടെ ഈ പരീക്ഷണം നിരീക്ഷിച്ചു വരികയാണ്. ഇതിന്റെ വിജയം മറ്റ് രാജ്യങ്ങളിലും സമാനമായ നിയമങ്ങള്‍ വരാൻ കാരണമായേക്കാം. എന്നാല്‍ നിലവിലെ റിപ്പോർട്ടുകള്‍ സൂചിപ്പിക്കുന്നത് സാങ്കേതികമായി ഈ നിരോധനം നടപ്പിലാക്കുന്നത് വലിയ വെല്ലുവിളിയാണെന്നാണ്.