ന്യൂഡല്‍ഹി: രാജ്യതലസ്ഥാനത്തെ പാലത്തിനടിയില്‍ കുടുങ്ങിയ വിമാനത്തിന്‍റെ വിഡിയോ കണ്ട് പലരും അന്തംവിട്ടിരിക്കുകയാണ്. ശനിയാഴ്ച രാത്രി ഡല്‍ഹി വിമാനത്താവളത്തിന് സമീപമാണ് സംഭവം.
എയര്‍ ഇന്ത്യ ഉപേക്ഷിച്ച വിമാനം പൊളിക്കാനായി റോഡിലൂടെ കൊണ്ടുപോകുന്നതിനിടെയാണ് പാലത്തിനടിയില്‍ കുടുങ്ങിയത്. ചിറകുകള്‍ ഒഴിവാക്കിയശേഷമാണ് ഡല്‍ഹി – ഗുരുഗ്രാം ഹൈവേയിലൂടെ വിമാനം കൊണ്ടുപോയത്. വിമാനം കുടുങ്ങിയതോടെ റോഡില്‍ ഗതാഗതക്കുരുക്കും അനുഭവപ്പെട്ടു.
വിഡിയോ വൈറലായതോടെ പ്രതികരണവുമായി എയര്‍ ഇന്ത്യ രംഗത്തുവന്നു. വിമാനത്തിന്‍റെ രജിസ്ട്രേഷന്‍ റദ്ദാക്കി വില്‍പ്പന നടത്തിയതായി എയര്‍ ഇന്ത്യ അറിയിച്ചു. വിമാനം െപാളിക്കാന്‍ വാങ്ങിയവര്‍ ശനിയാഴ്ച രാത്രി കൊണ്ടുപോകുേമ്ബാള്‍ പാലത്തിനടിയില്‍ കുടുങ്ങുകയായിരുന്നു. ഈ വിമാനവുമായി എയര്‍ ഇന്ത്യക്ക് ഇപ്പോള്‍ ഒരു ബന്ധവുമില്ലെന്നും അധികൃതര്‍ അറിയിച്ചു.
കുടുങ്ങിയ വിമാനം തങ്ങളുടെ ഭാഗമല്ലെന്ന് ഡല്‍ഹി എയര്‍പോര്‍ട്ട് അധികൃതരും വ്യക്തമാക്കി. ‘വിമാനം ചിറകുകളില്ലാതെയാണ് കൊണ്ടുപോകുന്നത്. പൊളിക്കാനുള്ളതാണിത്. ഡ്രൈവറുടെ ഭാഗത്ത് പറ്റിയ പിശകാകും വിമാനം കുടുങ്ങാന്‍ കാരണം’ -എയര്‍പോര്‍ട്ട് അധികൃതര്‍ കൂട്ടിച്ചേര്‍ത്തു.
സമാന രീതിയില്‍ മുമ്ബും വിമാനം പാലത്തിനടിയില്‍ കുടുങ്ങിയതിന്‍റെ ചിത്രങ്ങള്‍ ഏറെ ചര്‍ച്ചയായിരുന്നു. 2019ല്‍ പശ്ചിമ ബംഗാളിലെ ദുര്‍ഗാപുരിലായിരുന്നു സംഭവം.