ബെംഗളൂരു: ചില പെട്രോള്‍ പമ്പുകളില്‍ പെട്രോളില്‍ എഥനോള്‍ കലർത്തുന്നത് നിശ്ചിത പരിധിയായ 20 ശതമാനത്തിനും മുകളിലാണെന്ന സ്വന്തം സർക്കാരിന്റെ ആരോപണങ്ങളെ പിന്തുണച്ച്‌ കർണാടക മുഖ്യമന്ത്രി ഡികെ ശിവകുമാർ.ഇത് നിരവധി വാഹനങ്ങള്‍ക്ക് എഞ്ചിൻ തകരാറുകള്‍ക്കും മൈലേജ് കുറയുന്നതിനും കാരണമായതായി അദ്ദേഹം അവകാശപ്പെട്ടു.”ആയിരക്കണക്കിന് വാഹനങ്ങള്‍ പ്രശ്നങ്ങള്‍ നേരിടുന്നുണ്ടെന്ന് കാണിച്ച്‌ ഞങ്ങള്‍ക്ക് പരാതികള്‍ ലഭിച്ചിട്ടുണ്ട്. എഞ്ചിനുകള്‍ അടിക്കടി നിലയ്ക്കുകയും മൈലേജ് കുറയുകയും ചെയ്തിട്ടുണ്ട്, ഡി കെ പറഞ്ഞു. വിഷയത്തില്‍ അന്വേഷണം പുരോഗമിക്കുകയാണെന്നും ഏകദേശം 30 ശതമാനം ജോലികള്‍ പൂർത്തിയായെന്നും അദ്ദേഹം പറഞ്ഞു.
“ഞങ്ങള്‍ പരിശോധിച്ചു; പെട്രോള്‍ പമ്പുകളില്‍ വെച്ചാണ് ഇത് കലർത്തുന്നത്. വിതരണം ചെയ്യുന്ന സ്ഥലങ്ങളില്‍ വെച്ചാണ് ഈ കൂട്ടിച്ചേർക്കല്‍ നടക്കുന്നത്; ഇതിന്റെ എല്ലാ രേഖകളും ഞങ്ങളുടെ പക്കലുണ്ട്,” അദ്ദേഹം വ്യക്തമാക്കി.ഈ വിഷയം രാജ്യത്തെ മുഴുവൻ ബാധിക്കുന്ന ഒന്നാണെന്ന് ഡി കെ പറഞ്ഞു. “എഥനോള്‍ കുറഞ്ഞ വിലയ്ക്ക് ലഭ്യമായതിനാല്‍, ലാഭമുണ്ടാക്കാനായി അവർ ഇത് പെട്രോളില്‍ കലർത്തുകയാണ്. ഞങ്ങള്‍ ഇതിനെ അപലപിക്കുന്നു. ഇത് അപകടകരമാണ്. ജനങ്ങളെ ബോധവല്‍ക്കരിക്കുകയും സംരക്ഷിക്കുകയും വേണം,” എന്ന് പറഞ്ഞ അദ്ദേഹം, ഈ വിഷയത്തില്‍ തങ്ങള്‍ക്ക് മറ്റ് താല്പര്യങ്ങളൊന്നുമില്ലെന്നും കൂട്ടിച്ചേർത്തു.പെട്രോളില്‍ അനുവദനീയമായതില്‍ കൂടുതല്‍ എഥനോള്‍ കലർത്തുന്നുവെന്ന വാദങ്ങള്‍ തള്ളിക്കളഞ്ഞ ഓയില്‍ മാർക്കറ്റിംഗ് കമ്പനികള്‍, പരിശോധനയ്ക്കായി സ്വീകരിച്ച രീതികളെ ചോദ്യം ചെയ്തു. അതേസമയം, സർക്കാരിന്റെ അവകാശവാദങ്ങളെ പിന്തുണച്ചുകൊണ്ട്, വിഷയത്തില്‍ പൂർണ്ണമായ വിവരങ്ങളും രേഖകളും സഹിതം തിങ്കളാഴ്ച മന്ത്രി തലത്തില്‍ വാർത്താസമ്മേളനം നടത്തുമെന്ന് ഡി കെ പ്രഖ്യാപിച്ചു.
27 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി പൊതുമേഖലാ ഓയില്‍ മാർക്കറ്റിംഗ് കമ്പനികളില്‍ നിന്ന് ശേഖരിച്ച ഇ20 (E20) പെട്രോളിന്റെ 893 സാമ്പിളുകളും നിർദ്ദിഷ്ട ഗുണനിലവാര മാനദണ്ഡങ്ങള്‍ പാലിക്കുന്നുണ്ടെന്ന് പെട്രോളിയം സ്വാഭാവിക വാതക മന്ത്രാലയം വ്യക്തമാക്കിയതിന് പിന്നാലെയാണ് ഡി കെ ശിവകുമാറിന്റെ പ്രതികരണം.വാർത്താ സമ്മേളനത്തില്‍ സംസാരിക്കവെ, രാഷ്ട്രീയ കാരണങ്ങളാലല്ല താൻ ഈ വിഷയം ഉന്നയിക്കുന്നതെന്ന് ശിവകുമാർ പറഞ്ഞു. “ഇത് ഒരു പ്രതിപക്ഷ പാർട്ടി എന്ന നിലയിലുള്ള നിലപാടല്ല. ആർ. അശോകയെപ്പോലെ ഒരു പ്രതിപക്ഷ നേതാവെന്ന നിലയിലല്ല ഞാൻ സംസാരിക്കുന്നത്,” അദ്ദേഹം പറഞ്ഞു. ബന്ധപ്പെട്ട മന്ത്രിക്ക് നിർദ്ദേശം നല്‍കിയിട്ടുണ്ടെന്നും സാമ്പിളുകള്‍ ശേഖരിച്ച 67 സ്ഥലങ്ങളെക്കുറിച്ച്‌ കേന്ദ്രത്തെ അറിയിച്ചിട്ടുണ്ടെന്നും ഡി കെ പറഞ്ഞു.