തെങ്കാശി: തമിഴ്നാട്ടിൽ ആർഎസ്എസ് സംഘടിപ്പിച്ച റൂട്ട് മാർച്ചിൽ പങ്കെടുത്ത് ശതകോടീശ്വരനും സോഹോ കോർപറേഷന്റെ സഹസ്ഥാപകനുമായ ശ്രീധർ വെമ്പു. നവംബർ ഒന്നിന് തെങ്കാശി ജില്ലയിലെ ശങ്കരൻകോവിലിൽ നടന്ന മാർച്ചിൽ ആർഎസ്എസ് ഗണവേഷം ധരിച്ചാണ് അദ്ദേഹം പങ്കെടുത്തത്.ആർഎസ്എസിന്റെ ശതാബ്ദി ആഘോഷങ്ങളുടെ ഭാഗമായി തമിഴ്നാട്ടിലെ വിവിധ ജില്ലകളിൽ സംഘടിപ്പിച്ച രണ്ടാംഘട്ട ഘോഷയാത്രകളുടെ ഭാഗമായിരുന്നു മാർച്ച്. തെങ്കാശിയിൽ നിന്നുള്ള ബിജെപി പ്രവർത്തകൻ അനന്തൻ അയ്യാസ്വാമി മാർച്ചിന്റെ ചിത്രങ്ങൾ എക്സിൽ പങ്കുവയ്ക്കുകയും ബിജെപിയുടെ ജില്ലാ, ടൗൺ ഭാരവാഹികൾക്കൊപ്പം ശ്രീധർ വെമ്പു പങ്കെടുത്തതായി അറിയിക്കുകയും ചെയ്തു.
ഹൈക്കോടതി അനുമതിയോടെ റൂട്ട് മാർച്ച്തമിഴ്നാട്ടിലുടനീളം ഒക്ടോബർ 25, നവംബർ ഒന്ന് തീയതികളിൽ നിബന്ധനകൾക്കും പ്രാദേശിക പൊലീസിന്റെ നിർദേശങ്ങൾക്കും വിധേയമായി റൂട്ട് മാർച്ച് നടത്താൻ മദ്രാസ് ഹൈക്കോടതി ആർഎസ്എസിന് അനുമതി നൽകിയിരുന്നു. പ്രകടനങ്ങൾക്ക് അനുമതി നൽകുമെന്ന് സംസ്ഥാന സർക്കാർ അറിയിച്ചതിനെ തുടർന്ന് ഒക്ടോബർ 16ന് ജസ്റ്റിസ് വി. ലക്ഷ്മിനാരായണന്റെ ബെഞ്ച് ഇതുമായി ബന്ധപ്പെട്ട ഹർജി തീർപ്പാക്കി.ഭാവിയിൽ ലഭിക്കുന്ന റൂട്ട് മാർച്ചിനുള്ള അപേക്ഷകളിൽ കാലതാമസമില്ലാതെ തീരുമാനമെടുക്കണമെന്നും മുൻകാല നിർദേശങ്ങൾ പാലിക്കണമെന്നും കോടതി പൊലീസിന് നിർദേശം നൽകി. തമിഴ്നാട്ടിൽ റൂട്ട് മാർച്ചിന് പൊലീസ് അനുമതി നിഷേധിച്ചതിനെ തുടർന്നാണ് ആർഎസ്എസ് കോടതിയെ സമീപിച്ചത്. 2022 മുതൽ സംഘടന ഇത്തരം വിലക്കുകളും നിയന്ത്രണങ്ങളും നേരിടുന്നുണ്ടെന്ന് ആർഎസ്എസ് വടക്കൻ തമിഴ്നാട് സംസ്ഥാന സെക്രട്ടറി വി.ജി. ജഗദീശൻ വ്യക്തമാക്കിയിരുന്നു.
മാർക്സിസ്റ്റ് അധ്യാപകൻ സ്വാധീനിച്ചെന്ന് വെമ്പുസ്കൂൾ പഠനകാലത്ത് ഒരു മാർക്സിസ്റ്റ് അധ്യാപകൻ തന്നെ സ്വാധീനിച്ചതായി ശ്രീധർ വെമ്പു വെളിപ്പെടുത്തി മാസങ്ങൾക്കു ശേഷമാണ് അദ്ദേഹത്തിന്റെ ആർഎസ്എസ് റൂട്ട് മാർച്ചിലെ പങ്കാളിത്തം ശ്രദ്ധ നേടുന്നത്.ജൂലൈയിൽ എക്സിൽ പങ്കുവച്ച കുറിപ്പിൽ, ആർഎസ്എസ് അനുകൂലിയുടെ സാമ്പത്തിക സഹായത്തോടെ പ്രവർത്തിച്ചിരുന്ന സ്കൂളിലാണ് താൻ പഠിച്ചതെന്ന് വെമ്പു പറഞ്ഞിരുന്നു. എന്നാൽ, 14-ാം വയസ്സിൽ ഒരു അധ്യാപകന്റെ പാഠങ്ങൾ തന്നെ മാർക്സിസ്റ്റും നിരീശ്വരവാദിയുമാക്കി മാറ്റിയെന്നും അദ്ദേഹം കുറിച്ചു. അധ്യാപകൻ തന്നെ ബ്രെയിൻവാഷ് ചെയ്യുകയായിരുന്നുവെന്നാണ് ആ അനുഭവത്തെ വെമ്പു വിശേഷിപ്പിച്ചത്.വിവിധ ജില്ലകളിൽ ഘോഷയാത്രനവംബർ ഒന്നിന് തെങ്കാശി, കോയമ്പത്തൂർ, തിരുച്ചിറപ്പള്ളി, മധുര, പെരമ്പലൂർ, തേനി, ദിണ്ടിഗൽ, തിരുപ്പൂർ, ശിവഗംഗ, കന്യാകുമാരി തുടങ്ങിയ ജില്ലകളിലാണ് രണ്ടാംഘട്ട ഘോഷയാത്രകൾ നടന്നത്.കോയമ്പത്തൂരിൽ നടന്ന ഘോഷയാത്രയിൽ മുൻ കേന്ദ്ര സഹമന്ത്രി എൽ. മുരുകൻ പങ്കെടുത്തു. തിരുച്ചിറപ്പള്ളിയിൽ നടന്ന മാർച്ചിൽ 500ലധികം പേർ പങ്കെടുത്തതായും റിപ്പോർട്ടുകളുണ്ട്.