ഡൽഹി: എസ്‌ഐആറിനെതിരെ ജനാധിപത്യവും ഭരണഘടനയും വോട്ടവകാശവും സംരക്ഷിക്കണമെന്നാവശ്യപ്പെട്ട് ഇന്ത്യ സഖ്യത്തിന്റെ മഹാറാലി ഇന്ന് ഡൽഹിയിൽ നടക്കും. ഉച്ചയ്ക്ക് 12ന് കൊണാട്ട് പ്ലേസിലെ മിന്റോ റോഡിൽ നിന്ന് രാംലീല മൈതാനത്തേക്കാണ് മാർച്ച് ആരംഭിക്കുക. മാർച്ചിന്റെ റൂട്ട് മാപ്പ് നേതാക്കൾ സമൂഹമാധ്യമങ്ങളിലൂടെ പങ്കുവെച്ചു.ഏകദേശം ഒരു കിലോമീറ്റർ ദൂരമാണ് മിന്റോ റോഡിൽ നിന്ന് രാംലീല മൈതാനത്തേക്ക് മാർച്ച് നടത്തുക. ഇന്ത്യ സഖ്യത്തിന്റെ എംപിമാർ കോൺസ്റ്റിറ്റ്യൂഷൻ ക്ലബിൽ ഒത്തുചേർന്ന ശേഷമായിരിക്കും വേദിയിലേക്ക് എത്തുക. മാർച്ചിൽ പങ്കെടുക്കാൻ രാഹുൽ ഗാന്ധി നേതാക്കളോടും പ്രവർത്തകരോടും അഭ്യർഥിച്ചു.
ഒന്നിച്ചുനിന്ന് മുന്നോട്ടുപോകാമെന്നും അദ്ദേഹം വ്യക്തമാക്കി.കേരള മുഖ്യമന്ത്രി വി.ഡി. സതീശനും മഹാറാലിയിൽ പങ്കെടുക്കും. ജനാധിപത്യം അട്ടിമറിക്കപ്പെടുമ്പോൾ മൗനമായി ഇരിക്കാനാകില്ലെന്ന് അദ്ദേഹം എക്സിൽ കുറിച്ചു. ജനാധിപത്യത്തെയും ഭരണഘടനയെയും വോട്ടവകാശത്തെയും സംരക്ഷിക്കുന്നതിനായി ലക്ഷക്കണക്കിന് പൗരന്മാർക്കൊപ്പം ഡൽഹിയിലെ രാംലീല മൈതാനത്ത് അണിചേരുമെന്നും അദ്ദേഹം വ്യക്തമാക്കി.ഇതൊരു സാധാരണ പ്രതിഷേധമല്ലെന്നും ജനാധിപത്യം ഭീഷണി നേരിടുമ്പോൾ നിശബ്ദരായിരിക്കില്ലെന്ന ഉറച്ച പ്രഖ്യാപനമാണെന്നും വി.ഡി. സതീശൻ കൂട്ടിച്ചേർത്തു.
എസ്‌ഐആർ വിഷയത്തിൽ സെപ്റ്റംബർ 30ന് ചേർന്ന ഇന്ത്യ സഖ്യയോഗത്തിലാണ് സംയുക്ത പ്രക്ഷോഭ പരിപാടികൾക്ക് അന്തിമരൂപം നൽകിയത്. റാലികളും ജനാധിപത്യം സംരക്ഷിക്കാനുള്ള മാർച്ചുകളും ഉൾപ്പെടുന്നതാണ് സംയുക്ത കർമപദ്ധതി.ഇവിഎമ്മുകൾക്ക് പകരം ബാലറ്റ് പേപ്പറുകൾ ഉപയോഗിച്ച് തിരഞ്ഞെടുപ്പ് നടത്തണമെന്ന കാര്യത്തിൽ എല്ലാ പ്രതിപക്ഷ പാർട്ടികളും യോജിച്ചിട്ടുണ്ടെന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ നേരത്തെ വ്യക്തമാക്കിയിരുന്നു. ഇതിന്റെ ഭാഗമായാണ് നവംബർ ഒന്നിന് ഡൽഹിയിൽ മഹാറാലി സംഘടിപ്പിക്കാൻ തീരുമാനിച്ചത്.