വൻ മയക്കുമരുന്ന് വേട്ടയുമായി ബന്ധപ്പെട്ട് മലയാളികളടക്കം ആറുപേരെ ഡല്‍ഹി പോലീസ് ബംഗളൂരില്‍നിന്ന് പിടികൂടി.ഇവരില്‍നിന്ന് 21 കോടി രൂപ വിലമതിക്കുന്ന ആറ് കിലോഗ്രാമിനടുത്ത് മെത്താംഫെറ്റാമൈൻ (മെത്ത്) പിടിച്ചെടുത്തു.സുഹൈല്‍ എ.എം (31), സുജിൻ കെ.എസ് (32), ടോബി ന്വോയെകെ ഡെക്കോ (35), ചിക്വാഡോ നാകെ കിംഗ്സ്ലി (29), എം.ഡി. സഹീദ് (29), ഭാര്യ സുഹ ഫാത്തിമ (നേഹ (29) എന്നിവരാണ് അറസ്റ്റിലായത്.ചോദ്യം ചെയ്യലില്‍ ഡല്‍ഹിയില്‍നിന്ന് ബംഗളൂരിലേക്കും കേരളത്തിന്റെ വിവിധ ഭാഗങ്ങളിലേക്കും മയക്കുമരുന്ന് വിതരണം ചെയ്തിരുന്നതായി ഇവർ വെളിപ്പെടുത്തി.
സമൂഹമാധ്യമങ്ങളും മറ്റ് ഓണ്‍ലൈൻ പ്ലാറ്റ്‌ഫോമുകളും വഴി പ്രവർത്തിക്കുന്ന ഒരു നൈജീരിയൻ പൗരനാണ് തങ്ങളുടെ മയക്കുമരുന്ന് ഉറവിടമെന്ന് അറസ്റ്റിലായവർ പോലീസിനോട് പറഞ്ഞു. ഡല്‍ഹിയിലെ മോഹൻ ഗാർഡൻ പ്രദേശത്തുനിന്നാണ് ഈ നൈജീരിയൻ പ്രതിയെ പോലീസ് പിടികൂടിയത്.’ടോബി ന്വോയെകെ എന്ന ഡെക്കോയെ 64 ഗ്രാം മെത്തുമായി അറസ്റ്റ് ചെയ്തു. ഛത്തർപൂരിലെ ഇയാളുടെ വാടക വീട്ടില്‍ നടത്തിയ പരിശോധനയില്‍ 865 ഗ്രാം മയക്കുമരുന്ന് കൂടി കണ്ടെത്തി. വർഷങ്ങളായി ബംഗളൂരിലാണ് താമസിച്ചിരുന്നതെന്നും സുഹൈലിന് മെത്ത് വിതരണം ചെയ്തിരുന്നതായും ഡെക്കോ പോലീസിനോട് സമ്മതിച്ചു.
ബംഗളൂരിലെ മയക്കുമരുന്ന് വിതരണക്കാർക്കെതിരെ നടപടികള്‍ ശക്തമായതിനെ തുടർന്നാണ് ഇയാള്‍ ഡല്‍ഹിയിലേക്ക് താമസം മാറ്റിയത്. മുഖ്യൻ നൈജീരിയ ആസ്ഥാനമാക്കി പ്രവർത്തിക്കുന്നുണ്ടെന്നും ഇന്ത്യയിലുള്ള ആഫ്രിക്കൻ പൗരന്മാർ വഴിയാണ് മയക്കുമരുന്ന് എത്തിച്ചിരുന്നതെന്നും ഡെക്കോ വെളിപ്പെടുത്തി.തുടർന്ന് റാക്കറ്റിന്റെ സാമ്ബത്തിക ഇടപാടുകള്‍ നിയന്ത്രിക്കുന്നത് ബംഗളൂരില്‍നിന്നാണെന്ന് മനസ്സിലാക്കിയ പോലീസ് സംഘം അവിടെയെത്തി. ദിവസങ്ങളോളം നീണ്ട നിരീക്ഷണത്തിനൊടുവില്‍ ബൊമ്മനഹള്ളിയിലെ ഒരു പി.ജി. താമസസ്ഥലത്തുനിന്ന് ഫാത്തിമയെയും സഹീദിനെയും കണ്ടെത്തി അറസ്റ്റ് ചെയ്തു.
മയക്കുമരുന്നിന് അടിമയായിരുന്ന ആദ്യ ഭർത്താവിലൂടെയാണ് ഫാത്തിമ മയക്കുമരുന്ന് വ്യാപാരത്തിലേക്ക് എത്തിയതെന്ന് പോലീസ് പറഞ്ഞു. സഹീദിനെ പുനർവിവാഹം ചെയ്ത ശേഷം ഇരുവരും സുഹൈലിന്റെ മയക്കുമരുന്ന് ഇടപാടുകള്‍ക്ക് പണം മുടക്കി. ആദ്യം ചെറിയ അളവില്‍ വാങ്ങിയശേഷം പിന്നീട് വലിയ ഇടപാടുകളിലേക്ക് കടന്നതായി ഇവർ സമ്മതിച്ചു.കൂടുതല്‍ അന്വേഷണങ്ങള്‍ ഗ്രേറ്റർ നോയിഡയിലേക്ക് പോലീസിനെ എത്തിച്ചു. അവിടെ സെക്ടർ ഒന്നില്‍നിന്ന് കിംഗ്സ്ലി എന്ന മറ്റൊരു നൈജീരിയൻ പൗരനെ അറസ്റ്റ് ചെയ്തു. 2015-ല്‍ ചികിത്സക്കായി ഇന്ത്യയിലെത്തിയ കിംഗ്സ്ലി പിന്നീട് മയക്കുമരുന്ന് കടത്തില്‍ ഏർപ്പെട്ടു.
അജുക്കോ, ചിഗ്മോ എന്നീ രണ്ട് നൈജീരിയൻ പൗരന്മാർ കൂടി തൻ്റെ സഹായികളായി ഉണ്ടെന്ന് ഇയാള്‍ വെളിപ്പെടുത്തി. ഇവരില്‍ അജുക്കോ നൈജീരിയയിലേക്ക് മടങ്ങിയെന്നും അവിടെയിരുന്ന് നെറ്റ്‌വർക്ക് നിയന്ത്രിക്കുകയാണെന്നും കിംഗ്സ്ലി പറഞ്ഞു.ഈ സിൻഡിക്കേറ്റിന് ഡല്‍ഹി, ബംഗളൂരു, കേരളം എന്നിവിടങ്ങളുമായി ബന്ധിപ്പിക്കുന്ന ശക്തമായ വിതരണ ശൃംഖലയുണ്ടായിരുന്നു. നൈജീരിയക്കാർ വിതരണക്കാരായും ബംഗളൂരു ആസ്ഥാനമായുള്ള ദമ്ബതികള്‍ സാമ്ബത്തിക സഹായം നല്‍കിയും വിതരണം ഏകോപിപ്പിച്ചു.
വിദ്യാർത്ഥികള്‍, ഐടി പ്രൊഫഷണലുകള്‍, മറ്റ് യുവാക്കള്‍ എന്നിവരെ ലക്ഷ്യമിട്ടാണ് സിൻഡിക്കേറ്റ് പ്രവർത്തിച്ചിരുന്നത്.കേരള പോലീസില്‍നിന്ന് ലഭിച്ച രഹസ്യ വിവരത്തെത്തുടർന്ന്, നിരവധി എൻഡിപിഎസ് കേസുകളില്‍ പ്രതിയായ സുഹൈലിനെ ക്രൈംബ്രാഞ്ച് യൂണിറ്റ് നിരീക്ഷിച്ചുവരികയായിരുന്നു. ജൂലൈ 19-ന് സുഹൈലും സഹായി സുജിനും തെക്കുപടിഞ്ഞാറൻ ഡല്‍ഹിയിലെ ഒരു ഗസ്റ്റ് ഹൗസിലുണ്ടെന്ന് പോലീസിന് വിവരം ലഭിച്ചു.പോലീസ് നല്‍കിയ കൂടുതല്‍ വിവരങ്ങള്‍ പ്രകാരം, 2019-ല്‍ ദുബായില്‍നിന്ന് തിരിച്ചെത്തിയ സുഹൈല്‍ ആദ്യം ഒരു മയക്കുമരുന്ന് ഉപഭോക്താവായിരുന്നു.
ഒരു വർഷത്തിനുള്ളില്‍ സ്വന്തമായി ഒരു ശൃംഖല കെട്ടിപ്പടുത്തു. ‘ഡെഡ് ഡ്രോപ്പ്’ രീതി ഉപയോഗിച്ചായിരുന്നു ഇയാളുടെ വില്‍പന. മയക്കുമരുന്ന് പാക്കറ്റുകള്‍ ആളൊഴിഞ്ഞ സ്ഥലങ്ങളില്‍ ഉപേക്ഷിച്ചശേഷം, അതിന്റെ ചിത്രങ്ങളും ലൊക്കേഷനും വാങ്ങി ഉപഭോക്താക്കള്‍ക്ക് കൈമാറി. ആദ്യം ചെറിയ അളവില്‍ വാണിജ്യേതര വില്‍പന നടത്തിയ സുഹൈല്‍ പിന്നീട് വലിയ ഇടപാടുകളിലേക്ക് കടന്നു. 2024-ല്‍ ഇയാളുടെ സിൻഡിക്കേറ്റിലെ പലരും കേരള പോലീസിന്റെ പിടിയിലായി. മുൻ സെയില്‍സ്മാനും ക്യാബ് ഡ്രൈവറുമായിരുന്ന സുജിൻ പെട്ടെന്ന് പണം സമ്ബാദിക്കാൻ വേണ്ടിയാണ് സുഹൈലിനൊപ്പം ചേർന്നത്.നൈജീരിയൻ പൗരനായ ഡെക്കോ 2018-ല്‍ ഒരു വിദ്യാർത്ഥിയായിട്ടാണ് ഇന്ത്യയിലെത്തിയത്.
പിന്നീട് വിദ്യാർത്ഥികള്‍ക്കും ഐടി പ്രൊഫഷണലുകള്‍ക്കും മെത്ത് വില്‍പന തുടങ്ങി. ഗ്രേറ്റർ നോയിഡയില്‍ പ്രവർത്തിക്കുന്ന ഒബിച്ചി എന്ന ഓഗോ എന്ന മറ്റൊരു നൈജീരിയക്കാരനില്‍നിന്നാണ് ഇയാള്‍ക്ക് മയക്കുമരുന്ന് ലഭിച്ചിരുന്നത്. ബംഗളൂരു ആസ്ഥാനമായുള്ള ഫാത്തിമയും സഹീദും സുഹൈലിന്റെ ശൃംഖല വികസിപ്പിക്കാൻ വലിയ ഇടപാടുകള്‍ക്ക് സൗകര്യമൊരുക്കി. വിദേശത്തുള്ള നൈജീരിയക്കാരില്‍നിന്ന് മയക്കുമരുന്ന് വാങ്ങി വിതരണം ചെയ്യുന്ന ജോലിയാണ് കിംഗ്സ്ലി ചെയ്തിരുന്നത്.